ვინაობის დადასტურება Airbnb‑ზე

Airbnb‑ს შემთხვევაში ერთმანეთის ნდობა უმნიშვნელოვანესია — მსოფლიოს გარშემო მილიონობით ადამიანს მშვიდად უნდა შეეძლოს როგორც სტუმრობა, ისე სტუმრებისთვის მომსახურებების, შთაბეჭდილებებისა თუ საცხოვრებლების შეთავაზება.

ნდობის განმტკიცებაზე ზრუნვა

ნდობის განმტკიცების ერთ‑ერთი საკვანძო კომპონენტი ჩვენი მომხმარებლების ვინაობის დადასტურებაა. ამ რამდენიმეეტაპიანი პროცედურის მიზანია, ჩვენი გაერთიანების თითოეულმა წევრმა უფრო თავდაჯერებულად შეძლოს Airbnb‑ს პლატფორმით სარგებლობა იმის ცოდნით, რომ საქმეს რეალურ ადამიანებთან იჭერს. ვინაობის დადასტურება სავალდებულოა ყველა მასპინძლისთვის, ახალი თანამასპინძლისთვისა და ჯავშნის გაფორმების მსურველი სტუმრისთვის.

მართალია, ბოლომდე სრულყოფილი არცერთი პროცედურა არ არის, თუმცა ვინაობის დადასტურება გვეხმარება თაღლითობის შემთხვევების მინიმუმამდე დაყვანაში, უსაფრთხოების უზრუნველყოფასა და ჩვენი გაერთიანების წევრებისთვის რეალურ დროში ნაყოფიერი კომუნიკაციის საშუალების მიცემაში.

ვინაობის დადასტურების მიზანი

სტუმრებისა და მასპინძლების ვინაობის დადასტურება გვეხმარება:

• სტუმრებსა და მასპინძლებს შორის ნდობის განმტკიცებაში;
• Airbnb‑ს საყოველთაო მითითებების შესრულების უზრუნველყოფაში;
• თაღლითობის შემთხვევების შემცირებაში;
• ბიოგრაფიული მონაცემების შემოწმებაში, მოქმედი კანონმდებლობით დაშვებულ შემთხვევებში;
• უსაფრთხოების პრობლემებზე რეაგირებაში, შესაბამისი მხარდაჭერის გაწევასა და გამოძიების ჩატარებაში;
• მოქმედი კანონმდებლობისა (მათ შორის, საგადახდო ოპერაციებსა და გადასახადებთან დაკავშირებული კანონების) და რეგულაციების მოთხოვნების დაცვის უზრუნველყოფაში.

ვინაობის დადასტურების პრინციპი

ძირითადი მასპინძლებისგან, ახალი თანამასპინძლებისა და ჯავშნის გაფორმების მსურველი სტუმრებისგან ვინაობის დადასტურებას ვითხოვთ Airbnb‑ზე წარმოდგენილი ყველა საცხოვრებლის, მომსახურებისა და შთაბეჭდილების შემთხვევაში.

ვინაობის დადასტურება გულისხმობს გარკვეული პერსონალური ინფორმაციის (მაგალითად, ოფიციალური სახელის, მისამართის, ტელეფონის ნომრის, ასევე, სხვა საკონტაქტო მონაცემების) შემოწმებას სარწმუნო გარე წყაროებისა თუ პირადობის დამადასტურებელი ოფიციალური დოკუმენტების მიხედვით. ზოგიერთ შემთხვევაში აღნიშნული შესაძლებელია ჩვენს ხელთ უკვე არსებული ცნობების საფუძველზე, ზოგჯერ კი თქვენგან დამატებითი ინფორმაციის მოთხოვნა დაგვჭირდება. ვრცლად ამის შესახებ იხილეთ ქვემოთ.

ზოგიერთ მომხმარებელს საშუალება ექნება, ვინაობის დადასტურების პროცესში გამოიყენოს სახის ამოცნობის ტექნოლოგია.

ვინაობის დადასტურების მეთოდები განსხვავდება რეგიონების მიხედვით. მაგალითად, სამხრეთ კორეასა და ინდოეთში მცხოვრებ მომხმარებლებს ვინაობის დასადასტურებლად შეუძლიათ ისარგებლონ გარე პარტნიორების სერვისებით.

ვინაობის დასადასტურებლად თქვენ მიერ მოწოდებული ინფორმაცია არ გაზიარდება მასპინძლებსა თუ სტუმრებთან Airbnb‑ზე — ის დამუშავდება ჩვენი კონფიდენციალურობის დებულების შესაბამისად.

ინფორმაცია, რომელსაც ვითხოვთ

• ოფიციალური სახელი, მისამართი ან/და სხვა პერსონალური ინფორმაცია: ვინაობის დასადასტურებლად ზოგჯერ მხოლოდ პერსონალური ინფორმაციაა საკმარისი, თუმცა აღნიშნული დამოკიდებულია რამდენიმე ფაქტორზე, მათ შორის, იმ ქვეყანაში მოქმედ მოთხოვნებზე, რომელშიც იმყოფებით, და იმაზე, დაფიქსირდა თუ არა რაიმე უჩვეულო ქცევა ჩვენს პლატფორმაზე. რეგისტრაციის ან დადასტურების პროცესში თქვენი ოფიციალური სახელის მოწოდებას გთხოვთ, თუმცა საშუალება გაქვთ, ნებისმიერ დროს მიუთითოთ სასურველი სახელი, რომელიც შემდეგ ნაჩვენები იქნება მასპინძლებისა და სტუმრებისთვის.
• პირადობის დამადასტურებელი ოფიციალური დოკუმენტის ფოტო: თუ თქვენს ვინაობას ზემოაღნიშნული ინფორმაციის გამოყენებით ვერ დავადასტურებთ, ან თუკი თქვენს ქვეყანაში ვინაობის დადასტურების რომელიმე მეთოდი მიუწვდომელია ან სათანადოდ არ მუშაობს, შესაძლოა, პირადობის დამადასტურებელი ოფიციალური დოკუმენტის ფოტოს მოწოდება გთხოვოთ. მაგალითად, მართვის მოწმობის, პასპორტის ან ID‑ბარათის. სურვილისამებრ, შეგიძლიათ, გაეცნოთ დამატებით ინფორმაციას პირადობის დამადასტურებელი დოკუმენტების მისაღები ტიპებისა და სხვადასხვა ქვეყნისთვის გაწერილი მითითებების შესახებ.
• სელფი: ზოგიერთ შემთხვევაში, პირადობის დამადასტურებელი დოკუმენტის ზემოაღნიშნულ ფოტოსთან ერთად, შესაძლოა, თქვენი თავისთვის ფოტოს გადაღებაც გთხოვოთ. აღნიშნულ სელფის არ გამოვიყენებთ თქვენი პროფილისთვის და არც სხვა მომხმარებლებს გავუზიარებთ. თუ ვერ გადაიღებთ ისეთ სელფის, რომელიც თქვენს პირადობის დამადასტურებელ ოფიციალურ დოკუმენტში არსებულ ფოტოს ჰგავს, დაგვიკავშირდით. ჩვენ შემოგთავაზებთ ვინაობის დადასტურების ალტერნატიულ ხერხს.

თუ ზემოაღნიშნული ინფორმაციის გამოყენებით ვინაობის დადასტურებას ვერ მოახერხებთ, გარკვეულ გამონაკლის შემთხვევებში, შესაძლოა, უფლება მოგცეთ, ამ მიზნით წარმოადგინოთ სხვა დოკუმენტი (მაგალითად, ქორწინების მოწმობა ან სასამართლო დადგენილება).

ვინაობის დადასტურების საჭიროების დრო

სტუმრების შემთხვევაში

სტუმრის სტატუსით ვინაობის დადასტურება დაგჭირდებათ საცხოვრებლის, მომსახურების ან შთაბეჭდილების დაჯავშნისას. მომხმარებელთა უმეტესობას ეს მხოლოდ ერთხელ უწევს. ამასთან, ჩვენ ყველა ეტაპზე დაგეხმარებით.

როგორც წესი, სისტემა ვინაობის დადასტურებას გთხოვთ ანგარიშსწორების გვერდზე, სადაც მითითებული იქნება ბოლო ვადაც. აღნიშნული პერიოდის განმავლობაში თქვენი ჯავშანი მოლოდინის რეჟიმში იქნება და სხვები ვერ დაჯავშნიან თქვენ მიერ არჩეულ თარიღებს. ბოლო ვადა რომ არ გამოგრჩეთ, შეხსენებებს გამოგიგზავნით ელწერილების, SMS‑შეტყობინებებისა და Push‑გაფრთხილებების სახით (გააჩნია, რომელი მეთოდი გირჩევნიათ). თუ ვინაობას განსაზღვრულ ვადაში არ დაადასტურებთ, თქვენი ჯავშანი არ დადასტურდება.

გაითვალისწინეთ: თუ თქვენს ანგარიშში ოფიციალურ სახელს ან სხვა ინფორმაციას ჩაასწორებთ, ასევე, გარკვეულ სხვა შემთხვევებში (მაგალითად, თუ რაიმე რისკი გამოიკვეთება), შესაძლოა, ვინაობის ხელახლა დადასტურება დაგჭირდეთ.

ვინაობის ხელახლა დადასტურება ზოგჯერ ხორციელდება მყისიერად, თქვენ მიერ ჩვენთვის უკვე მოწოდებული ინფორმაციის (მაგალითად, თქვენი სახელისა და საკონტაქტო მონაცემების) გამოყენებით. ამასთან, ისიც შესაძლებელია, რომ დამატებითი ნაბიჯების გავლა მოგიწიოთ. ყოველივე ეს არ აისახება უკვე დაჯავშნილ სტუმრობებზე, თუმცა ახალ ჯავშანს ვერ გააფორმებთ, სანამ შესაბამის ცვლილებას არ დაადასტურებთ.

შენიშვნა: თუ ჯავშნის გაფორმებას აპირებთ, უაღრესად მნიშვნელოვანია, შეძლებისდაგვარად მალე წარმოგვიდგინოთ საჭირო ინფორმაცია. მაგალითად, თუ დაბინავება მომდევნო 12 საათის განმავლობაშია დაგეგმილი, ვინაობის დასადასტურებლად 1 საათი გექნებათ. სხვა შემთხვევებში ვინაობის დადასტურება შესაძლებელია ჯავშნის გაფორმებიდან 12 საათის განმავლობაში. აღნიშნული პერიოდის განმავლობაში ჯავშანს მომლოდინე სტატუსი ექნება და ის არ დადასტურდება, თუ ვინაობას თქვენთვის განსაზღვრულ ვადაში არ დაადასტურებთ.

მასპინძლების შემთხვევაში

თუ მასპინძლობას იწყებთ, ვინაობის დადასტურება დაგჭირდებათ საცხოვრებლის, მომსახურების ან შთაბეჭდილების შესახებ განცხადების პირველად შექმნისას, ასევე, როცა ახალ თანამასპინძლად მოგიწვევენ. მართალია, მასპინძლებისთვის ვინაობის დასადასტურებლად ვადა დადგენილი არ არის, თუმცა თქვენი განცხადება არ გამოქვეყნდება ამ მოთხოვნის შესრულებამდე. ეს იმას ნიშნავს, რომ ვინაობის დადასტურების გარეშე ვერ მიიღებთ ჯავშნებს. ანალოგიურად, თუ თანამასპინძლად მოგიწვიეს, ვინაობის დადასტურება მოგიწევთ, მოწვევას რომ დაეთანხმოთ.

გაითვალისწინეთ: თუ მასპინძლის ან თანამასპინძლის სტატუსით თქვენს ანგარიშში ოფიციალურ სახელს ან სხვა ინფორმაციას ჩაასწორებთ, ასევე, გარკვეულ სხვა შემთხვევებში (მაგალითად, თუ რაიმე რისკი გამოიკვეთება), შესაძლოა, ვინაობის ხელახლა დადასტურებაც დაგჭირდეთ.

თუ ძირითადი მასპინძელი ხართ და ვინაობის ხელახლა დადასტურება მოგიწევთ, თქვენი არსებული ჯავშნები უცვლელი დარჩება, თუმცა განცხადებების კალენდრები დაგებლოკებათ ამ მოთხოვნის შესრულებამდე. თანამასპინძლები, რომლებიც არ არიან ძირითადი მასპინძლები, შესაძლოა, წაიშალონ შესაბამისი განცხადებებიდან, თუ ვინაობას არ დაადასტურებენ ამის საჭიროების შემთხვევაში.

პროცედურის ხანგრძლივობა

ინფორმაციის წარმოდგენის შემდეგ ვინაობის დასადასტურებლად, როგორც წესი, 1 საათზე ნაკლები გვჭირდება. ზუსტი ვადა დამოკიდებულია ქვეყანაზე, რომელშიც ცხოვრობთ, ასევე, თქვენ მიერ მოწოდებულ ინფორმაციაზე.

წარმოდგენილი ინფორმაცია უნდა იყოს მართებული, ზუსტი და უახლესი. წინააღმდეგ შემთხვევაში, შესაძლოა, ვინაობის დადასტურების დრო გაჭიანურდეს ან თქვენთან დამატებითი ინფორმაცია დაგვჭირდეს.

თუ ხართ სტუმარი, რომელიც ჯავშანს აფორმებს, აუცილებლად დაასრულეთ ვინაობის დადასტურება დადგენილ ვადაში. აღნიშნული პერიოდის განმავლობაში თქვენი ჯავშანი მოლოდინის რეჟიმში იქნება და სხვები ვერ დაჯავშნიან თქვენ მიერ არჩეულ თარიღებს. ბოლო ვადა რომ არ გამოგრჩეთ, შეხსენებებს გამოგიგზავნით ელწერილების, SMS‑შეტყობინებებისა და Push‑გაფრთხილებების სახით.

სამოქმედო რჩევები პრობლემების შემთხვევაში

• შეამოწმეთ შეტყობინებები: შესაძლოა, დამატებითი ინფორმაცია მიიღეთ ტელეფონზე ან ელფოსტით. თუ ფიქრობთ, რომ ჩვენი შეტყობინება გამოტოვეთ, მიჰყევით ამ მითითებებს.
• მიუთითეთ თქვენი ოფიციალური სახელი და გვარი: თქვენ მიერ მოწოდებული ოფიციალური სახელი უნდა ემთხვეოდეს საჯარო ბაზებში ან თქვენს პირადობის დამადასტურებელ დოკუმენტში დაფიქსირებულს. თუ თქვენი ოფიციალური სახელი შეიცვალა (მაგალითად, ქორწინების ან გენდერული იდენტობის დადასტურების შემდეგ), შეგიძლიათ დაუკავშირდეთ ჩვენს მხარდაჭერის გუნდს, რომელიც დაგეხმარებათ ახალი ოფიციალური სახელის დადასტურებაში ქორწინების მოწმობის, სასამართლო დადგენილების ან იურიდიული ძალის მქონე სხვა დოკუმენტის მეშვეობით. მართალია, ვინაობის დადასტურების პროცესში მხოლოდ ოფიციალური სახელი უნდა გამოიყენოთ, საშუალება გაქვთ, მიუთითოთ სასურველი სახელი, რომელიც მის ნაცვლად იქნება ნაჩვენები სტუმრებისა და მასპინძლებისთვის.
• დაუშვით კამერის გამოყენება: შესაძლოა, Airbnb‑ს აპს ან თქვენს ბრაუზერს კამერის გამოყენების ნებართვა დასჭირდეს. აღნიშნული ნებართვის Airbnb‑სთვის მინიჭების ინსტრუქციის პოვნა შესაძლებელია ბრაუზერის ან აპის პარამეტრებში. თუ ნებართვების ჩასწორების შემდეგ პრობლემა არ მოგვარდება, სცადეთ ჩვენი აპის ან ვებსაიტის გადატვირთვა.
• გამოიყენეთ მაღალხარისხიანი ფოტოები: გადაიღეთ ფოტოები კარგად განათებულ ოთახში. ამას გარდა, დარწმუნდით, რომ კადრები მკაფიოა, მათ არაფერი ეფარება და ისინი ეტევა ვინაობის დადასტურების პროცედურის დროს წარმოდგენილ ჩარჩოებში. სელფების შემთხვევაში დაშვებულია რელიგიური თავსაბურავების გამოყენება — მთავარია, ჩანდეს თქვენი თვალები, ცხვირი და პირი. აღნიშნული სელფი არ იქნება ნაჩვენები Airbnb‑ს სხვა მომხმარებლებისთვის და არც თქვენს პროფილს დაემატება.
• გადაიღეთ თქვენი ფოტო მიმდინარე მომენტში: თუ სელფის მოწოდებას გთხოვთ, ის მისი გაგზავნის მომენტში უნდა გადაიღოთ. ძველი ფოტოები ამ მიზნით არ უნდა გამოიყენოთ. ის არ იქნება ნაჩვენები Airbnb‑ს სხვა მომხმარებლებისთვის და არც თქვენს პროფილს დაემატება.
• გამოიყენეთ პირადობის დამადასტურებელი მოქმედი დოკუმენტის დედანი: აღბეჭდეთ პირადობის დამადასტურებელი დოკუმენტის დედანი, რომელსაც მოქმედების ვადა არ გასვლია. ამ მიზნით არ გამოდგება ქსეროასლები, PDF‑ვერსიები ან სხვა ტიპის ციფრული ასლები. თუ პირადობის დამადასტურებელ დოკუმენტს ორი მხარე აქვს (მაგალითად, მართვის მოწმობის ან ID‑ბარათის შემთხვევაში), უნდა წარმოადგინოთ როგორც წინა, ისე უკანა მხარის ფოტოები. გაითვალისწინეთ, რომ შესაძლოა, დაგჭირდეთ დამატებითი მითითებების შესრულებაც, რაც თქვენს მდებარეობაზეა დამოკიდებული.

ადგილები, სადაც აისახება დადასტურებული ვინაობის ნიშანი

ვინაობის დადასტურების შემდეგ მიიღებთ დადასტურებული ვინაობის ნიშანს. Airbnb‑ზე თქვენი პროფილის ფოტოსთან მოცემული იქნება წითელი აღნიშვნა თოლიის სიმბოლოთი, ხოლო თქვენს პროფილში — დადასტურებული ვინაობის ბმული შესაბამის სტატუსთან ერთად. თუ მასპინძელი ხართ, დადასტურებული ვინაობის ნიშანი და ბმული, შესაძლოა, ასევე, მოცემული იყოს თქვენი განცხადების „მასპინძლის“ სექციაში. მომხმარებლის პროფილის ბარათზე ან დადასტურებული ვინაობის ბმულზე შეხების შემთხვევაში დაინახავთ იმ თვესა და წელს, როცა მომხმარებელმა პირველად გაიარა ვინაობის დადასტურების პროცედურა Airbnb‑ზე. გაითვალისწინეთ, რომ ზოგიერთ მომხმარებელს შეეძლო, დაეკარგა დადასტურებული ვინაობის სტატუსი ან ხელახლა დაედასტურებინა ვინაობა აღნიშნული თარიღის შემდეგ.

თუ მსხვილი ბიზნესსუბიექტის სტატუსით მასპინძლობთ, შესაძლოა, რამდენიმე ანგარიში გქონდეთ თქვენი ყველა განცხადების სამართავად. მსგავს შემთხვევებში არსებობს ალბათობა, რომ დადასტურებული ვინაობის ნიშანი არ გამოჩნდეს თქვენ მიერ მასპინძლობისთვის გამოყენებულ ყველა ანგარიშში, მმართველ ბიზნესსუბიექტს დადასტურება რომც გაევლო.

დადასტურებული ვინაობის ნიშნის დაკარგვა

თუ თქვენს პერსონალურ ინფორმაციას (მაგალითად, ოფიციალურ სახელს) შეცვლით, ან თქვენი ანგარიშიდან წაშლით პირადობის დამადასტურებელ ოფიციალურ დოკუმენტს, შესაძლოა, დაკარგოთ დადასტურებული ვინაობის ნიშანი და ხელახლა მოგიწიოთ შესაბამისი პროცედურის გავლა, თუ მომავალში ჯავშნის გაფორმებას ან სტუმრების მასპინძლობას დააპირებთ.

საიდენტიფიკაციო ინფორმაცია, რომლის მოთხოვნაც შეუძლია მასპინძელს

როცა ჯავშანს აფორმებთ, Airbnb არ უზიარებს მასპინძელს თქვენს პირადობის დამადასტურებელ ოფიციალურ დოკუმენტს. ამის მიუხედავად, მასპინძელს უფლება აქვს, მოგთხოვოთ მისი წარმოდგენა ჯავშნის გაფორმების შემდეგ, თუკი ამის საჭიროება აღნიშნული იყო განცხადების აღწერილობის სექციაში, როცა ჯავშანს აფორმებდით. ამისთვის მასპინძელს უნდა ჰქონდეს სამართლებრივი საფუძველი, როგორც ეს განმარტებულია Airbnb‑ს წესებში პლატფორმის მიღმა მოქმედებასთან დაკავშირებით.

ზოგიერთ რეგიონში მოქმედებს კანონები, რომლებიც სტუმრებს ხელისუფლების ადგილობრივ ორგანოებში რეგისტრაციას ავალდებულებს. რეგისტრაციის გავლა შესაძლებელია როგორც უშუალოდ ხელისუფლების ადგილობრივ ორგანოებში, ისე საცხოვრებელში — მასპინძლის შუამავლობით. სხვა სიტყვებით რომ ვთქვათ, თუკი იმ რეგიონში მდებარე საცხოვრებელი დაჯავშნეთ, სადაც აღნიშნული წესი მოქმედებს, B&B‑ს, ჰოსტელის, სასტუმროს ან Airbnb‑ზე განთავსებული სხვა საცხოვრებელი ობიექტის მასპინძელს უფლება ექნება, მოგთხოვოთ რეგისტრაციის გავლა.

თქვენი მონაცემების გაზიარების ხერხები

Airbnb ნდობაზე აგებული გაერთიანებაა. ნდობის მოსაპოვებლად კი, უპირველეს ყოვლისა, მკაფიოდ უნდა გვქონდეს განმარტებული ის, თუ როგორ ვიყენებთ თქვენს ინფორმაციას.

თქვენ მიერ წარმოდგენილ ინფორმაციაზე წვდომა ექნებათ მხოლოდ Airbnb‑სა და მომსახურების გარე მომწოდებლების უფლებამოსილ თანამშრომლებს. ამასთან, მთელი ინფორმაცია შეინახება და გადაიცემა დაცული მეთოდებით. თქვენი საიდენტიფიკაციო ინფორმაცია გაზიარდება მომსახურების გარე მომწოდებლების უფლებამოსილ თანამშრომლებთან, რომლებიც ხელს გვიწყობენ ვინაობის, დოკუმენტებისა და ბიოგრაფიული მონაცემების (მოქმედი კანონმდებლობით დაშვებულ შემთხვევებში) შემოწმებაში.

თქვენი მონაცემების მართვის ხერხები

პირადობის დამადასტურებელი ოფიციალური დოკუმენტის ფოტოებსა და სელფებს, რომლებსაც ვინაობის დადასტურების პროცესში ვიღებთ, ვინახავთ, თუ ეს საჭიროა მოქმედი კანონმდებლობის მოთხოვნებთან შესაბამისობისთვის, სასამართლო პროცესებისთვის, სამართლებრივი თუ უსაფრთხოების საკითხების გამოძიებებისა და პრეტენზიების განხილვისთვის, ასევე, უსაფრთხოების უზრუნველყოფის ან/და სამართალდამცავი ორგანოების მოთხოვნების შესრულების მიზნით.

შენიშვნა: მრავალ რეგიონში (მათ შორის, ევროკავშირში) პირადობის დამადასტურებელი ოფიციალური დოკუმენტების გამოსახულებები ინახება მათი მიღებიდან სამი წლის განმავლობაში, ხოლო სელფები — თქვენი ანგარიშის მოქმედების პერიოდის განმავლობაში. გამონაკლისია შემთხვევები, როცა გამოსახულებების შენახვა საჭიროა უფრო გრძელი ვადით (როგორც აღწერილია ზემოთ).

თქვენი პირადობის დამადასტურებელი დოკუმენტის წაშლის შემდეგაც ვინახავთ მასში მითითებულ გარკვეულ ინფორმაციას (მაგალითად, თქვენს დაბადების თარიღს), თქვენი ანგარიშის მართვის მიზნით, მოქმედი კანონმდებლობის მოთხოვნების დასაკმაყოფილებლად და, ზოგადად, უსაფრთხოების უზრუნველსაყოფად.

ვინაობის დადასტურების პროცესში შეგროვებული ინფორმაცია მუშავდება ჩვენს კონფიდენციალურობის დებულებაში განმარტებული წესით. ჩვენ მიერ შეგროვებული ინფორმაციის მაგალითებსა და გამოყენების შესაძლო მიზნებს გაეცნობით ქვემოთ.

• თქვენ მიერ ჩვენთვის მოწოდებული პერსონალური ინფორმაცია, მაგალითად, ოფიციალური სახელი, მისამართი და დაბადების თარიღი:
  • ვინაობის დადასტურების პროცედურის უზრუნველყოფა ზემოთ განმარტებული წესით;
  • უსაფრთხოების პრობლემებზე რეაგირება და მათი მოგვარება Airbnb‑ს პლატფორმის მომხმარებლებისა და უფრო ფართო საზოგადოების დასაცავად;
  • სამართალდამცავი ორგანოების მომართვებზე რეაგირება და მიმდინარე გამოძიებებში მათი ხელშეწყობა; საჯარო ხელისუფლების ორგანოების მოთხოვნებზე რეაგირება;
  • Airbnb‑ს საყოველთაო მითითებების შესრულების უზრუნველყოფა;
  • მოქმედი კანონმდებლობის (მათ შორის, საგადახდო ოპერაციებსა და გადასახადებთან დაკავშირებული კანონების) მოთხოვნების დაცვის უზრუნველყოფა;
  • თაღლითობის შემთხვევების გამოვლენა;
  • ბიოგრაფიული მონაცემების შემოწმება, მოქმედი კანონმდებლობით დაშვებულ შემთხვევებში;
• თქვენ მიერ მოწოდებული პირადობის დამადასტურებელი ოფიციალური დოკუმენტი ან სხვა მსგავსი დოკუმენტაცია:
  • ვინაობის დადასტურების პროცედურის უზრუნველყოფა ზემოთ განმარტებული წესით;
  • უსაფრთხოების იმ პრობლემებზე რეაგირება და მათი მოგვარება, რომლებიც ეხება ჩვენი პლატფორმის მომხმარებლებსა და უფრო ფართო საზოგადოებას;
  • სამართალდამცავი ორგანოების მომართვებზე რეაგირება და მიმდინარე გამოძიებებში მათი ხელშეწყობა;
  • მოქმედი კანონმდებლობის (მათ შორის, საგადახდო ოპერაციებსა და გადასახადებთან დაკავშირებული კანონების) მოთხოვნების დაცვის უზრუნველყოფა;