Tista' taqra dil-artiklu bl-Ispanjol jew bl-Ingliż.
Dal-artiklu jagħti ħarsa ġenerali lejn il-liġijiet u r-regolamenti reġjonali li jistgħu jolqtu lill-Hosts fil-Komunità ta' Valencia. Minbarra dal-liġijiet, il-muniċipalitajiet jafu jkunu approvaw xi regoli u/jew restrizzjonijiet marbuta mat-tqassim tal-art li jistgħu jolqtu lill-attività tiegħek. Jeħtieġlek tiżgura li timxi mal-liġijiet u r-regolamenti li jistgħu jgħoddu għall-każ u l-post tiegħek.
Nissuġġerulek tagħmel ir-riċerka tiegħek għax dal-artiklu mhux komplut u ma jistax jitqies bħala parir legali jew fiskali. Minħabba li ma naġġornawx dal-artiklu f'ħin reali, jekk jogħġbok iċċekkja s-sorsi kollha u ara li l-informazzjoni li ssib ma tkunx għadha kif inbidlet. Ikseb parir legali u/jew fiskali għall-każ tiegħek.
Il-Gvern Reġjonali ta' Valencia għandu regoli speċifiċi għall-akkomodazzjonijiet għat-turisti. Il-liġi tat-Turiżmu ta' Valencia tiddefinixxi "akkomodazzjoni turistika" bħala proprjetà sħiħa irrispettivament mit-tip tagħha, li, wara li tkun kisbet rapport muniċipali favorevoli li jiddikjara l-kompatibbiltà urbana ta' tali użu, tiġi offruta bi skambju għal prezz, taħt kundizzjonijiet ta' disponibbiltà immedjata, fuq bażi regolari u għal skopijiet turistiċi, għal perjodu ta' inqas minn jew ugwali għal għaxart (10) ijiem. Skopijiet turistiċi jiġu preżunti meta (1) il-kiri ta' proprjetà jkun ġestit minn parti terza; (2) is-sid jew id-detentur tat-titlu jipprovdi servizzi ta' ospitalità, irrispettivament mit-tul tal-kiri; (3) il-proprjetà tkun offruta permezz ta' kanali turistiċi.
Skont id-Digriet reġjonali dwar is-suġġett, l-akkomodazzjonijiet għat-turisti fil-Komunità ta' Valencia għandhom jiġu offruti bħala post sħiħ (unità waħda). Il-kiri ta' kmamar lit-turisti huwa pprojbit b'mod espliċitu.
Kull post fejn toqgħod mikri għal iktar minn ħdax-il (11) jum wara xulxin lill-istess persuna ma jitqiesx bħala post fejn toqgħod għat-turisti u għalhekk ma jkunx obbligat li jimxi mar-rekwiżiti tar-regolament imsemmi hawn fuq.
Fil-Komunità ta' Valencia, jeħtieġlek tirreġistra kull post fejn toqgħod li beħsiebek toffri bħala akkomodazzjoni għat-turisti fir-Reġistru tat-Turiżmu ta' Valencia. Bħala parti mill-proċess, l-ewwel trid tibgħat dikjarazzjoni ta' responsabbiltà lid-Direttorat Ġenerali għat-Turiżmu li tiddikjara li qed timxi mar-regolamenti attwali u kull rekwiżit ieħor previst fil-livelli reġjonali u lokali.
Wara li tlesti l-proċess tar-reġistrazzjoni, l-akkomodazzjoni turistika tiegħek se tingħata numru tar-reġistrazzjoni (Eżempju: CV-VUT-00000000-CS).
Biex issir taf iktar dwar ir-rekwiżiti, l-obbligi jew kull suġġett ieħor marbut mal-ospitalità li għandek tkun taf bihom, tista' taqra l- Mistoqsijiet Komuni tal-Gvern Reġjonali ta' Valencia.
Biex tilqa' n-nies ġewwa Spanja, jaf jeħtieġlek tikseb numru tar-reġistrazzjoni nazzjonali mir-Reġistru tal-Propjetà u turih meta ttella' l-propjetajiet tiegħek fuq Airbnb.
Aqra dal-artiklu għal iktar informazzjoni dwar l-obbligi tar-reġistrazzjoni nazzjonali u suġġetti oħra marbuta ma' dal-qasam.
L-awtoritajiet tal-Belt ta' Valencia jeħtieġu li fuq kull forma ta' riklam għall-akkomodazzjoni turistika tiegħek, inkluż dak ta' Airbnb, turi n-numru ta' reġistrazzjoni u l-post eżatt tal-propjetà. Hemm qasam fejn tista' ddaħħal in-numru tar-reġistrazzjoni tiegħek fit-taqsima tad-dettalji tal-Listing.
Biex issir taf iktar dwar ir-regoli għall-postijiet fejn toqgħod għat-turisti ġewwa Valencia u kif jistgħu jolqtu lilek jew lill-propjetà tiegħek, tista' tikkuntattja lid-Delegazzjoni Territorjali tal-Innovazzjoni, l-Industrija, il-Kummerċ u t-Turiżmu.
Aħna nimpenjaw ruħna li naħdmu mal-awtoritajiet tal-post biex nagħmlu r-regoli marbuta mal-ekonomija kollaborattiva iktar ċari u biex ngħinhom jifhmu l-benefiċċji li Airbnb iġġib magħha għall-komunità tagħna. Kull meta jkun meħtieġ, se nkomplu nħarsu kull bidla li tagħti lill-individwi l-possibbiltà li jikru d-djar tagħhom.